ТЕНДЕРИЙГ ИЛ ТОД БОЛГОЖ, ОРОН НУТГИЙН КОМПАНИУДАА ДЭМЖИХ ХЭРЭГТЭЙ

2017 оны 02 сарын 09
ТЕНДЕРИЙГ ИЛ ТОД БОЛГОЖ, ОРОН НУТГИЙН КОМПАНИУДАА ДЭМЖИХ ХЭРЭГТЭЙ

Барилгын чиглэлээр үйл ажиллагаа явуулдаг компаниудын төлөөлөлтэй санал бодлоо солилцох “Өглөөний цай” уулзалтыг зохион байгууллаа. Уулзалтад аймгийн удирдлагууд, холбогдох албаны дарга, мэргэжилтнүүд болон орон нутагтаа тогтвортой үйл ажиллагаа явуулж байгаа барилгын компаниудын төлөөлөл оролцож, тулгамдаж буй асуудал, цаашид шийдвэрлэх арга зам, удирдлагын түвшинд тэднийг бодлогоор хэрхэн дэмжиж ажиллах нөхцөл боломж байгааг харилцан ярилцлаа.

Өнөөдрийн байдлаар манай аймагт 48 барилгын компани албан ёсны зөвшөөрөлтэй үйл ажиллагаа явуулж байна. Тус компаниудад барилга, эрчим хүч, цахилгаан, ус дулаан хангамж, холбооны 108 инженер ажиллаж байгаа нь мэргэжлийн боловсон хүчин хангалттай гэсэн үг юм.

Орон нутгийн барилгын компаниуд нь ямар ч түвшний барилгын ажил гүйцэтгэх нөөц бололцоотой байхад Улаанбаатар болон бусад аймгийн компаниуд төсөв өндөр тендерийг авч гүйцэтгэж байна. Энэ нь эргээд олон сөрөг талтай. Тухайлбал орон нутгийн компаний оролцоог бууруулдаг, ямар нэг эрсдэл гарахад хариуцлага тооцоход хүндрэл тулгардаг. Тиймээс орон нутгийн компаниа бодлогоор дэмжиж ажиллахыг санал болголоо.

Мөн  тендерийн шалгаруулалтыг ил тод нээлттэй болгож орон нутгийн компаниа давуу эрхтэй оролцуулах, ахмад барилгачдын нийгмийн асуудлыг шийдвэрлэх, газар хөдлөлт болон барилгын ажил үйлчилгээтэй холбоотой бусад сэдвийн хүрээнд барилгын салбарын ажилчдыг сургалтад хамруулахад төрөөс дэмжих, хувийн хөрөнгө оруулалтаар баригдаж буй барилгад өнгө үзэмж харагдах байдлын хувьд стандарт байгаа тал дээр анхаарах, барилга барихдаа ногоон байгууламж, гадна талбайн тохижилтын асуудлыг шийдвэрлэх зэрэг олон саналуудыг хэлэлцлээ.

Өмнөговь аймагт барилгын салбар хөгжиж байна. Цаашид ямар ч түвшний барилгын ажлыг гүйцэтгэхэд бэлэн. Шат шатандаа орон нутгийн компаниа дэмжиж, бүтээн байгуулалтад хамтран ажиллах хүсэлтэй байгаагаа оролцогчид илэрхийлсэн бол аймгийн удирдлагууд болон холбогдох албаны хүмүүс тулгамдаж буй дээрх  асуудлыг шийдвэрлэж, эргэх холбоог сайжруулж хамтран ажиллахаа мэдэгдлээ.

Мэдээний талаар?

Холбоотой мэдээлэл:


Сэтгэгдэл бичих: